24 abr. 2015

O sainete preelectoral

Teatrillo montado pola Deputación para asinar o convenio
do campo de fútbol e, de paso, promocionar o candidato do PP
Sabiamos que o PP e o PSOE son practicamente o mesmo, pero tiñamos a esperanza de que a nivel local houbese algunha diferenza e que ambos marcasen distancias entre si ou que empezasen a facer algunha proposta construtiva para todos e todas nós. De momento nada de nada. Da súa postura con respecto ao futuro de San Sadurniño só sabemos o que vemos en internet e o que hai só mostra sectarismo e rexeitamento contra o proxecto nacionalista.

As redes sociais e os boletíns publicados pola oposición foron nas últimas semanas o tapete no que se están poñendo as cartas cara arriba e semella que a partida das próximas eleccións se vai xogar a tres con PP-PSOE formando parella. Hai sintonía total: as trolas e barrabasadas que din uns no facebook son aplaudidas e comentadas profusamente polos outros, os candidatos búscanse para sentar nos plenos un a carón do outro e vímolos facendo corrillo para saír na foto do trasnoitado e vergoñento teatrillo armado polo gabinete de Diego Calvo para escenificar a sinatura do convenio do campo de fútbol. Ningún garda nin en público nin en privado que o único que os move é botar ao bloque do Concello a toda costa. Fraca motivación para quen se presentan a unhas eleccións.

Éche o que hai, como se acostuma dicir. O BNG decatouse hai tempo e os veciños e veciñas de San Sadurniño por sorte tamén se están dando conta desa cordialidade interesada que nada ten que ver coa mellora do concello, senón cun simple “quitemos a éstos para ponernos nosotros y después ya veremos qué hacemos”. E para iso válelles todo.

O PP tira pola demagoxia, a mentira e o ataque sen paliativos a calquera persoa que mostre algunha afección polo que representa o BNG. Na dereita local usan a técnica da man de ferro en guante de terciopelo. Primeiro descalifican e sementan infundios e depois poñen cara de non ter roto nunca un prato, cos ollos afogados en bágoas para apelar á compaixón da audiencia virtual montando un auténtico melodrama. “Los del Bloque son unos demonios!… Me quieren hundir!… Me vetan!… Secundino es un dictador!… Todo San Saturnino tiene miedo!… Hai que echarlos a todos del ayuntamiento!” son frases que ben poderían formar parte deste sainete traxicómico que levan representando varias semanas.

Fixádevos ata que punto chegan as cousas que o candidato popular asegurou en facebook que “estando no público” dun pleno recibiu “insultos e empuxóns”. Incrible. Se fose verdade debería denunciar tal agresión e se fose verdade seguro que a había denunciar con toda a razón do mundo. Se fose verdade… porque nos plenos hai público, grávanse e cólganse enteiros en internet desde o ano pasado e en ningún deles se oe semellante cousa.

Sendo así espérannos unhas semanas movidas e cun terreo de xogo enlamado no que o BNG non se vai meter. Exporemos as nosas ideas e proxectos para San Sadurniño, igual que fixemos sempre. Desta vez a nosa candidatura denomínase BNG-Asembleas abertas porque, máis que nunca, fai falla a colaboración de todas e todos para continuar facendo de San Sadurniño un concello distinto onde calquera pode formar parte dun proxecto ilusionante, incluso quen nos dá leña sen motivo.

1 abr. 2015

Xa temos aprobada a lista coa que concorremos ás eleccións de maio

A asemblea aberta do BNG reunímonos en Igrexafeita hai dúas semanas para aprobar a composición da lista electoral para as eleccións municipais do próximo mes de maio. Somos 21 nomes procedentes das sete parroquias do municipio e cunha paridade de xénero case total dentro do que permite o número (10 mulleres e 11 homes). Xente con ganas de traballar desde o Concello na procura dun novo modelo que lle volva ás persoas os dereitos, as liberdades e a soberanía sobre o seu futuro que lles foi arrebatada polo bipartidismo nos últimos anos.

Trátase dunha candidatura con oito novas incorporacións con respecto á de 2011 e na que se mestura a experiencia na xestión municipal co pulo e as ideas frescas da mocidade. Entre todos e todas confiamos  en revalidar unha maioría suficiente para continuar transformando San Sadurniño. 

O BNG-Asembleas Abertas organizou nos últimos meses varios encontros coa veciñanza co obxectivo de sumar propostas e puntos de vista a partir dos que construír o programa co que se presentará ás eleccións de maio. Temos practicamente listas as liñas estratéxicas do programa electoral, ao que calquera persoa pode facer achegas que se incorporarán ao documento definitivo. 

Podedes darnos ideas no  facebook da agrupación local, a través da web www.bng.gal/sansadurninho, ou contárnolas persoalmente en calquera momento.  Participade con total liberdade e coa coa garantía de que se terán en conta todas as propostas. 

Para estas eleccións o BNG non vai facer envíos de propaganda electoral nin tampouco dos sobres coas papeletas. Segundo os cálculos do Bloque, se todos os partidos adoptasen a mesma postura poderían aforrárselle ao Estado 2 millóns de euros só en Galicia. San Sadurniño sabe de sobras o poder transformador que ten un voto e goza da madurez democrática necesaria para exercer en conciencia e liberdade ese dereito.


Lista aprobada polo BNG-Asembleas abertas

1- Secundino García

2- Sabela Íñiguez

3- Manolo Varela

4- Amparo Calvo

5- Suso Soto

6- Ana Belén Breijo

7- Manolo Beceiro

8- Mari Carme Muíño

9- David García

10- Lorena Bouza

11- David Arnoso

12- Pilar Cebreiro

13- Tomás Calvo

14- Raquel Rivas

15- Pedro Rodríguez

16- Vanessa Martínez

17- Dani Felgar

18- Oriana López

19- Jaime Vigo

20- Mª Carme García

21- Pepe López Gudín

8 ene. 2015

En campaña

Estamos en campaña. Si, si, aínda que falten case seis meses para as eleccións municipais, xa estamos en campaña. Pero non nunha campaña na que os partidos da oposición nos presentan as súas alternativas para facelo tan ben ou mellor que o BNG, senón unha campaña de acoso e derribo de todo o que representa o traballo do BNG.
O PP e o PSOE xa se posicionaron. Parece que a súa estratexia será botar por terra estes últimos catro anos de intenso traballo nacionalista en San Sadurniño. De momento non se lles oe outra cousa que non sexa poñernos como a ruína do concello. Non é algo novo. O "van acabar con todo" levámolo oíndo oito anos. E mentres acabamos con todo... temos case todas as pistas amañadas, unha nova Casa do Concello, unha escola infantil lista para abrir, as persoas maiores ben atendidas, a xente pode participar nos asuntos públicos, temos ducias de actividades organizadas en colaboración cun tecido asociativo dinámico e vivo...
Igual é por iso que os dous fan oposición mirando máis por intereses particulares que polo interese de toda a veciñanza. O ata agora candidato dos socialistas leva varios plenos preguntando por como están as cousas coa cooperativa de San Sadurniño. Ten toda a información á súa disposición, pero a recorrencia coa que saca o tema nos plenos danos que pensar. ¿Cal será a razón de tanta insistencia? ¿Estará alguén do PSOE utilizando as siglas do partido para defender as súas comenencias valéndose do portavoz como amplificador?.
O PP tamén ten interese. O seu portavoz preguntou no pleno por este asunto do que tedes información ao final deste Embloque e sobre o que o Concello tamén mandou un comunicado a través do boletín Novas. Pero nese partido non se cortan en recoñecer que o seu é algo máis que “querer saber”. O flamante candidato popular publicou textualmente nas redes sociais: "na cooperativa estamos esperando os informes dos técnicos". Nós e calquera que saiba ler interpretámolo como unha implicación persoal nesta cuestión que leva a preguntarse por cal será a súa postura se sae elixido alcalde: ¿pagará o millón e medio de euros que piden os liquidadores?. ¿Será capaz de arruinar o Concello indo en contra do interese público e da veciñanza de San Sadurniño? e, se o fixese, ¿como o xustificaría diante da xente?. Andaremos e veremos.
O que non se lle pode negar ao candidato do PP é a súa habilidade para facerse notar e tersiverxar a realidade. Vímolo claramente cando se colocou na foto da reforma do convento do Rosario ben pegadiño ao presidente da Deputación coma se tivese algo que ver no asunto. Aínda non foron as eleccións, non ten a representatividade nin a lexitimidade que dan as urnas e xa se retrata inaugurando obras de forma oficiosa. Debe pensar que o carisma e o apoio da xente se conseguen facendo só iso, poñéndose para a foto. E a cousa non para aí. Nas redes sociais tamén o candidato larga trolas a mansalva como a de que o novo Concello custou tres millóns de euros, que o BNG votou en contra da herba artificial para o campo de fútbol de Corrás -unha trola deles que quedou en evidencia no último pleno-, que se en San Sadurniño é onde máis se paga de contribución urbana, que o Concello fai investimentos en propiedades privadas….
En fin..., esta é a oposición coa que nos tocará lidiar nos próximos meses. Aínda faltan nomes por darse a coñecer pero todos, dunha e doutra cor, comparten o odio ou o resentimento contra todo o que signifique BNG. Poucas propostas lles escoitaredes, só atacar ao bloque. Son libres de facelo, é o seu xeito de entender a política, pero nos tempos que corren cremos que lles fai falla traballar máis en positivo e exprimir algo a cabeciña para que dela saia algunha idea construtiva para todos e todas nós. Porque a cabeza, por se non o sabían, serve para algo máis que para poñer podre ao bloque desde detrás dos mostradores.

5 jun. 2013

Queremos poder de decisión para impulsar o desenvolvemento da comarca. Únete á folga do 12 de xuño!

A nosa comarca sofre os efectos das políticas neoliberais da UE executadas nos últimos anos polo o goberno do Estado e da Xunta. O seu resultado directo é un desemprego do 32% -10 puntos por riba da media galega – motivado polo peche de empresas e a aplicación da nova reforma laboral. Caldo de cultivo en definitiva para a emigración dunha mocidade preparada pero falta de expectativas, e para o incremento da pobreza e a exclusión social.
O noso potencial bate con decisións políticas que, como no caso do naval, levaron ao progresivo desmantelamento dun sector estratéxico da nosa economía. ASTANO permanece practicamente pechado polo inxusto veto europeo e Navantia Ferrol perdeu máis de 2000 empregos no último ano, mentres que en Europa hai estaleiros saturados de carga de traballo.
Detrás da liquidación do emerxente sector eólico tamén están decisións políticas que deben responder pola destrucción de máis de 1500 postos de traballo nos últimos cinco anos, obrigando ao peche de numerosas empresas e á deslocalización de outras.
O desemprego, o peche de empresas, a redución de salarios, o aumento dos impostos e a apropiación dos nosos aforros para rescatar a banca privada están a esmagar o consumo. As familias non gastan, afogadas como están pola crise. En consecuencia o comercio cae en picado e tanto o número de establecementos como a cifra de negocio volve na comarca aos niveis de hai quince anos.
Os gobernos do PP en Madrid e en Santiago tampouco crean as condicións necesarias para que as cousas cambien. Nin sequera no tocante ao mantemento ou mellora das infraestruturas que sustentan o sector primario. As rías da volta seguen sen depurar, o marisqueo non recibe o pulo que precisa como actividade estratéxica, as flotas pesqueiras redúcense en atención aos ditados europeos... e na terra as cousas non pintan mellor. A gandaría -sobre todo o vacún de leite- afronta un mercado liberalizado á mercede das grandes superficies comerciais; o mesmo que o forestal, cunha lei de montes ditada polas grandes madeireiras, máis interesadas na súa propia riqueza a curto prazo que no aproveitamento sustentábel dos bosques.
Non estamos diante dunha crise. Estamos perante un atraco planeado polos grandes poderes financieiros e executado con impunidade polos dous gobernos que nos toca sufrir. Todo para seguir incrementando as súas millonarias ganancias a costa do sacrificio das maiorías sociais.
Precisamos alternativas. E a primeira e fundamental pasa por termos a capacidade de decidir sobre os nosos asuntos: defender e promover os nosos sectores produtivos, crear emprego, defender os servizos públicos....Rescatar para nós a soberanía que nos roubaron os mercados.
Para o BNG a Folga Xeral do próximo 12 de xuño debe ser un paso adiante da comarca de cara a crear un movemento social que free as decisións e as políticas que nos negan o futuro. Cómpren cambios que nos permitan decidir, producir e traballar na nosa terra. De todas e todos nós depende.


19 abr. 2013

O BNG de San Sadurniño presenta tres mocións para debatilas no pleno de maio

Todos os grupos da oposición están en contra da reforma local do PP

O portavoz do grupo municipal do BNG no Concello, Xesús Soto, rexistrou este 18 de abril tres mocións que se incorporarán á orde do día do pleno ordinario do próximo mes de maio. Na primeira delas o Bloque solicita que a corporación adopte a postura de reprobar os 15 deputados e deputadas galegas do PP que votaron a favor da quitación das participacións preferentes e subordinadas. A segunda moción esixe a retirada do anteproxecto de lei da reforma local deseñada polo goberno estatal, mentres que o terceiro documento que se levará a pleno busca que a Xunta non implante un novo copagamento nos comedores escolares.

As mocións presentadas debateranse do pleno ordinario do 4 de maio. Na primeira delas -a referida ao asunto da quitación por mor das preferentes e subordinadas- acúsase ao goberno de Mariano Rajoy de desenvolver estritas políticas en beneficio da banca e en detrimento dos milleiros de persoas estafadas con estes produtos financeiros.

O escrito critica duramente a actitude dos deputados galegos do PP que, malia ser o noso país o máis afectado, apoiaron como mellor solución as quitacións abusivas e o canxe por accións que en ningún caso lles permitirán aos aforradores estafados recuperar os seus cartos. O montante total cífrase en 600 millóns de euros "que emigrarán fóra do noso país en canto se consume este roubo individual ás persoas directamente afectadas e a Galiza no seu conxunto". A moción rexeita estas políticas e solicita que se declare como persoas non gratas en San Sadurniño a Antonio Eiras, Antonio Pérez, Tristana Moraleja, Juan de Dios, Joaquín García, Jaime de Olano, Olga Iglesias, Celso Delgado, Guillermo Collarte, Ana Belén Vázquez, Ana Pastor, Irene Garrido, Paz Lago, Telmo Martín e Marta González Vázquez, como corresponsables na "legalización desta estafa".

Copagamento dos comedores
O BNG tamén rexistrou unha moción na que se solicita o apoio da corporación para instar á Xunta de Galicia para que non se aplique un novo copagamento nos comedores escolares. "Un novo recorte no dereito á educación [...] que carga sobre as precarias economías das familias a obriga de facer fronte ao pago dunha parte importante deste servizo", tal e como reflicte a exposición de motivos na que tamén se critica que esta decisión se tome mentres se destinan 240 millóns de subvención ao ensino concertado máis outros 3 millóns a centros que segregan ao alumnado por razón de xénero.

Por esta razón, o BNG de San Sadurniño solicita que non se estableza o copagamento dos comedores, que se garanta un servizo de calidade e que se amplíe a súa gratuidade para o alumnado de infantil e primaria con poucos recursos.

Contra do anteproxecto de lei da reforma local
Por último, o Bloque Nacionalista Galego tamén someterá á valoración plenaria a solicitude de que se retire o anteproxecto de lei da reforma local. Un articulado que a xuízo do BNG implica un ríxido límite á autonomía local que, ademais, sitúa a contención do gasto público por riba da atención ás necesidades sociais da cidadanía. Apunta o BNG que baixo o eufemismo de "evitar dualidades" escóndese unha tendencia recentralizadora que atenta contra a autonomía municipal e que lle dá maior protagonismo ás deputacións, os entes "máis prescindíbeis do entramado insitucional actual".

A lei crea, ademais, mecanismos intervencionistas cos que o Estado busca exercer un maior control sobre os concellos, especialmente sobre aqueles que queiran desenvolver políticas alternativas ao sistema neoliberal imperante.

A moción que se leva ao pleno incide en que se inste ao goberno estatal para retirar o anteproxecto de lei de Racionalización e Sustentabilidade da Administración local. Ademais tamén se solicita unha reforma constitucional que suprima as deputacións provinciais e que a reforma do rexime local se centre en darlles máis competencias ás comunidades autónomas para que cada unha adapte a regulación dos municipios á súa realidade territorial. Xunto con estes puntos, o BNG tamén busca o apoio plenario para solicitarlle ao goberno un plan de financiamento para os concellos que lles permita custear servizos públicos locais e tamén que o acordo alcanzado no pleno se lle remita ao presidente da Xunta, ao do Goberno do Estado, ao Parlamento galego, ao Congreso e o Senado e, por último, á FEGAMP e a FEMP.

3 abr. 2013

O BNG de Ferrolterra renova o seu Consello Comarcal


O Consello Comarcal resultou elixido por unanimidade
Uns 150 militantes déronlle este mércores 3 de abril o visto e prace á única candidatura presentada para conformar o Consello Comarcal do BNG de Ferrolterra. Reunidos en asemblea no centro cívico de Caranza expresamos o noso apoio total a unha lista formada por 20 nomes máis outros 6 suplentes encabezada por Mercedes Tobío, quen repite como voceira comarcal.

Durante a asemblea quedaron patentes os retos organizativos aos que nos enfrontamos desde o Bloque nun contexto de crise socioeconómica e tras vivir  fondos e convulsos cambios nos últimos tempos.

Entre eles destacan a necesidade de reactivar a presenza do BNG en todo o tecido social das localidades recuperando ao mesmo tempo a capacidade de coordinación entre elas.

Ademais tamén marcamos como obxectivo prioritario continuar espallando propostas vinculadas á realidade comarcal en permanente contacto coa cidadanía.

Retos que son compromisos para o novo Consello Comarcal, formado polos seguintes nomes que, do posto 1 ao 9 constitúen, ademais, a Executiva:
  1. Mercedes Tobío
  2. Manuel Polo
  3. Ana González
  4. Secundino García
  5. Manrola Mosqueira
  6. Xesús Sánchez
  7. Eva Guerreiro
  8. Xesús Soto
  9. Elena Díaz
  10. Manuel R. Doval
  11. Andrea Pardo
  12. Francisco da Silva
  13. Inés Roca
  14. Fernando Igrexas
  15. Susana Senra
  16. Iván Rivas
  17. Marga Leirachá
  18. Manuel Rei
  19. Carmen Castro
  20. Xabier Sánchez
Suplentes:
Elia Rico
Anxo Fernández
Teresa Sabio
Fernando Branco
Rocío Trastoi
Marcos Sánchez


16 oct. 2012

San Sadurniño crea emprego con iniciativas propias e contribúe a fixar poboación no medio rural


A comezos de decembro iniciaranse as obras de rehabilitación das antigas escolas do Cerdeirido, en Naraío, e das Loibas, en Bardaos. O goberno do BNG en San Sadurniño preparou un proxecto pioneiro en Galiza que prevé converter estes inmobles en vivendas. A idea vén de vello e agora o goberno local obtivo o financiamento necesario para levala a cabo. Está previsto investir arredor de 60.000 euros en cada unha das escolas. A iniciativa municipal permitirá, ademais, darlle emprego nos traballos a cinco persoas durante uns seis meses.
As antigas unitarias converteranse en vivendas

O goberno do BNG busca, desta maneira, dous obxectivos. Por unha banda por en valor un patrimonio que está practicamente en desuso e, por outra, contribuír á creación de emprego no concello. Os proxectos de rehabilitación das dúas escolas están xa elaborados e recollen as características que terán as futuras vivendas unifamiliares. Respectarase no posible a estrutura existente e sustituiranse todos os elementos en mal estado, aproveitando para facer divisións e incorporar elementos de eficiencia enerxética como paneis solares, cociña calefactora ou, como no caso de Naraío, unha galería orientada ao sur que axude a caldear a casa no inverno.

Segundo o alcalde, Secundino García, “non se trata dunha simple rehabilitación, senón que buscamos converter as escolas en vivendas confortables, duradeiras e con todos os servizos necesarios”. O proxecto cifra as intervencións en Bardaos e Naraío en 127.343 euros. O Concello vai facer as obras por administración, é dicir, mercando os materiais e contratando directamente o persoal necesario. “Desta maneira sae máis barato e, sobre todo, permitiranos crear cinco postos de traballo durante uns seis meses para persoas que nestes momentos estean no paro”, explica o alcalde.


Un proxecto para a xente
O Concello de San Sadurniño fala do proxecto como un investimento “útil, sustentable e socialmente necesario” que, segundo as contas do goberno local, “terá un custe cero a medio prazo para as arcas municipais”. Unha vez que se executen as obras -que deberán comezar en decembro e estar listas en xuño do ano que vén- a intención do executivo local é abrir un proceso que permita a súa ocupación “dándolle prioridade a familias e xente moza de San Sadurniño, xa que o BNG cre firmemente nas posibilidades de futuro do medio rural e por iso quere contribuír a fixar poboación” e insiste en que “non vai haber especulación cun ben de primeira necesidade como é a vivenda. Chegado o momento publicaranse as bases cos requisitos que as familias deberán cumprir para optar ás novas casas construídas polo Concello. ”

Se o proxecto sae como está previsto, o goberno local quere continualo con outros inmobles municipais. “Ademais das escolas de Bardaos e de Naraío, o Concello tamén posúe a de Ferreira de riba, a de Igrexafeita e a de Silvalonga que están en desuso e algunhas nun estado ruinoso e que tamén serían susceptibles de converterse en vivendas.”